مسودة — لسه في انتظار المراجعة القانونية قبل الإطلاق العام.
باختصار
- بنستخدم صورة طفلك عشان نرسم شخصية كرتون بس. مش بنبيعها، ومش بننشرها، ومش بنستخدمها في إعلانات.
- الصورة الأصلية بتتمسح من عندنا خلال ٢٤ ساعة من ما توافق على الشخصية، وأقصى حاجة ٧ أيام من رفعها.
- مش بنستخدم أي تقنية للتعرّف على الوجوه أو قياس ملامح الوش.
- تقدر تمسح طفل أو حسابك كله في أي وقت من التطبيق.
بنجمع إيه؟
- بيانات الحساب: الإيميل، وتاريخ الدخول.
- بيانات الطفل: الاسم الأول، ولد ولا بنت، والسن التقريبي — بتكتبهم إنت.
- الصور: صورة أو اتنين بترفعهم، والشخصية اللي بنرسمها منهم.
- حفظ التقدم على الجهاز: لو الاتصال قطع، التقدم اللي لسه متبعتش بيتحفظ في المتصفح عشان نجرب نرفعه تاني. مفيش صور في الحفظ ده. بيتشال لما تمسح الطفل أو الحساب من نفس الجهاز، والنسخ الأقدم من ٣٠ يوم بتتنضف عند استخدام الحفظ تاني.
- اللعب: النجوم والحروف اللي اتدرّب عليها، ووقت اللعب في اليوم، واللبس اللي اختاره، عشان نوريهولك ونطبّق حد الوقت لو اخترته.
- ألبوم البطل: الصور اللي طفلك بياخدها لشخصيته في لعبة «دولاب البطل». بتظهر ليك إنت بس، وإنت اللي تقرر تشاركها، والطفل مبيقدرش يشارك حاجة من اللعبة.
- لينكات المشاركة (لو عملت): لو عملت لينك للعبة، أي حد معاه اللينك يقدر يلعبها بشخصية طفلك والاسم الأول بس، من غير حساب. إنت اللي بتختار تبعته لمين، وتقدر توقّفه في أي وقت، وبيقف لوحده بعد المدة اللي اخترتها. اللي بيلعب من اللينك مش بيتسجل عنه حاجة غير عدد مرات الفتح، وصورة المعاينة في الواتساب مفيهاش طفلك.
- اسم طفلك في الألعاب: عشان صوت اللعبة يقول اسمه («فين يوسف؟»)، الاسم الأول بس (من غير أي صورة) بيتبعت لخدمة الصوت بتاعة Google (Gemini) مرة واحدة، والتسجيل بيتحفظ مع بيانات الطفل وبيتمسح معاها.
- الرقم السري لوضع الأطفال: بنحفظه متشفّر (مش الرقم نفسه)، وبيستخدم بس عشان تخرج من وضع الأطفال، مش للدخول على حسابك. اختيارك للألعاب المسموحة لكل طفل بيتحفظ مع بيانات الطفل.
- صوتك (لو سجّلت): الجمل القصيرة اللي بتسجّلها بصوتك عشان طفلك يسمعها في الألعاب. محدش بيسمعها غير طفلك وإنت.
- الموافقة: وقت موافقتك كولي أمر ونسخة النص اللي وافقت عليه. لو وافقت برسالة (واتساب مثلاً) بدل التطبيق، بنسجّل إزاي ووافقت إمتى ورقمك أو حسابك اللي وافقت منه.
مين بيشوف الصور؟
الصور خاصة بحسابك، وفريقنا يقدر يشوفها للمساعدة عند الحاجة. الصور محفوظة على سيرفراتنا (OVH في أوروبا) وبتتفتح بروابط مؤقتة وموقّعة. عشان نرسم الشخصية، الصورة بتتبعت مشفّرة لشريك تقني متخصص في معالجة الصور (Together AI في الولايات المتحدة) لمرة الرسم بس. فريقنا ممكن يشوف الشخصية المرسومة لو طلبت مساعدة أو لو الرسم فشل وكنا بنصلّحه.
عشان الألعاب تفتح أسرع، ملفات الألعاب نفسها والأصوات العامة (مش صوتك ولا اسم طفلك) بتتحمّل من شبكة Cloudflare. زي أي موقع، Cloudflare بيشوف عنوان الإنترنت (IP) ونوع الجهاز اللي بيحمّل الملفات دي، لكن مفيش أي صورة أو شخصية أو اسم أو بيانات لطفلك بتعدّي عليه.
فريق شقاوة ممكن يساعدك في إعداد حسابك وصور طفلك: يعمل الحساب، أو يضيف الطفل، أو يرفع الصور اللي بعتّهالنا بعد موافقتك. عشان كده بندخل حسابك للمساعدة بس، وكل حاجة بنعملها جوّه متسجلة عندنا. مبنقدرش من جوّه حسابك نوافق بالنيابة عنك، ولا نمسح الحساب، ولا نعمل لينكات مشاركة، ولا نغيّر تسجيلات صوتك أو نفتح ألبوم البطل.
بنحتفظ بالبيانات قد إيه؟
- الصورة الأصلية والرسومات الخام: ٢٤ ساعة بعد موافقتك، وأقصى حاجة ٧ أيام.
- الشخصية النهائية وتقدّم اللعب وتسجيلات صوتك وألبوم البطل (آخر ٤٠ صورة): لحد ما تمسح الطفل أو الحساب (والتسجيل تقدر تمسحه لوحده في أي وقت).
- النسخ الاحتياطية: بتتمسح لوحدها بعد ١٤ يوم.
حقوقك
من حقك تشوف بياناتك، وتصلّحها، وتمسحها، وتسحب موافقتك في أي وقت. المسح متاح من صفحة الطفل ومن الإعدادات. لأي طلب تاني كلّمنا على الإيميل اللي وصلتك منه الدعوة.